ਸਚਿਨ ਤੇ ਕੋਹਲੀ ਨੇ ਧੋਨੀ ਨੂੰ ਸ਼ੁੱਭਕਾਮਨਾਵਾਂ ਦਿਤੀਆਂ

ਨਵੀਂ ਦਿੱਲੀ : ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਅਤੇ ਭਾਰਤੀ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ ਦੀ ਅਗਵਾਈ 'ਚ ਕ੍ਰਿਕਟ ਜਗਤ ਨੇ ਦੋ ਵਾਰ ਵਿਸ਼ਵ ਕੱਪ ਜੇਤੂ ਸਾਬਕਾ ਕਪਤਾਨ ਮਹਿੰਦਰ ਸਿੰਘ ਧੋਨੀ ਨੂੰ ਦੂਜੀ ਪਾਰੀ ਲਈ ਸ਼ੁੱਭਕਾਮਨਾਵਾਂ ਦਿਤੀਆਂ। ਸਚਿਨ ਨੇ ਟਵੀਟ ਕੀਤਾ, ''ਭਾਰਤੀ ਕ੍ਰਿਕਟ 'ਚ ਤੁਹਾਡਾ ਯੋਗਦਾਨ ਬਹੁਤ ਵਡਾ ਹੈ ਮਹਿੰਦਰ ਸਿੰਘ ਧੋਨੀ। ਇੱਕਠੇ 2011 ਦਾ ਵਿਸ਼ਵ ਕੱਪ ਜਿੱਤਣਾ ਮੇਰੇ ਜੀਵਨ ਦਾ ਸਰਬੋਤਮ ਪਲ ਹੈ। ਤੁਹਾਡੇ ਅਤੇ ਤੁਹਾਡੇ ਪ੍ਰਵਾਰ ਨੂੰ ਤੁਹਾਡੀ ਦੂਜੀ ਪਾਰੀ ਲਈ ਸ਼ੁੱਭਕਾਮਨਾਵਾਂ।''
ਕੋਹਲੀ ਨੇ ਟਵੀਟ ਕੀਤਾ, ''ਸਾਰੇ ਕ੍ਰਿਕਟਰਾਂ ਨੂੰ ਇਕ ਦਿਨ ਅਪਣੀ ਯਾਤਰਾ ਦਾ ਅੰਤ ਕਰਨਾ ਹੁੰਦਾ ਹੈ ਪਰ ਜਦੋਂ ਤੁਸੀਂ ਕਿਸੇ ਨੂੰ ਇੰਨਾ ਨੇੜੇਉਂ ਜਾਣਦੇ ਹੋ ਅਤੇ ਉਹ ਇਸ ਫ਼ੈਸਲੇ ਦਾ ਐਲਾਨ ਕਰਦਾ ਹੈ ਤਾਂ ਤੁਸੀਂ ਜਿਆਦਾ ਭਾਵੁਕ ਹੋ ਜਾਂਦੇ ਹੋ। ਤੁਸੀਂ ਦੇਸ਼ ਲਈ ਜੋ ਕੀਤਾ ਉਹ ਹਮੇਸ਼ਾ ਸਾਰਿਆਂ ਦੇ ਦਿਲਾਂ 'ਚ ਰਹੇਗਾ।'' ਭਾਰਤੀ ਟੀਮ ਦੇ ਮੁੱਖ ਕੋਚ ਰਵਿ ਸ਼ਾਸ਼ਤਰੀ ਨੇ ਟਵੀਟ ਕੀਤਾ, ''ਉਨ੍ਹਾਂ ਦੀ ਥਾਂ ਲੈਣਾ ਸੌਖਾ ਨਹੀਂ ਹੋਵੇਗਾ। ਇਸ ਦੀ ਕੋਈ ਬਰਾਬਰੀ ਨਹੀਂ।''
ਵਿਰੇਂਦਰ ਸਹਿਵਾਗ ਨੇ ਲਿਖਿਆ, ''ਹੁਣ ਅਜਿਹਾ ਖਿਡਾਰੀ ਹੋਣਾ, ਮਿਸ਼ਨ ਇਮਪਾਸਿਬਲ ਹੈ। ਨਾ ਕੋਈ ਹੈ, ਨਾ ਕੋਈ ਸੀ, ਨਾ ਕੋਈ ਹੋਵੇਗਾ ਧੋਨੀ ਵਰਗਾ। ਕਪਤਾਨ ਵਜੋਂ ਤੁਸੀਂ ਜੋ ਕੀਤਾ ਉਸ ਨੂੰ ਹਮੇਸ਼ਾ ਯਾਦ ਰਖਿਆ ਜਾਵੇਗਾ। '' ਪਾਕਿਸਤਾਨ ਦੇ ਸਾਬਕਾ ਤੇਜ ਗੇਂਦਬਾਜ਼ ਸ਼ੋਹੇਬ ਅਖ਼ਤਰ ਨੇ ਲਿਖਿਆ, ''ਮਹਿੰਦਰ ਸਿੰਘ ਧੋਨੀ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਨੂੰ ਅਲਵਿਦਾ ਕਿਹਾ। ਉਸ ਦੇ ਬਿਨਾਂ ਕ੍ਰਿਕਟ ਦੀ ਕਹਾਨੀ ਪੂਰੀ ਨਹੀਂ ਹੋਵੇਗੀ। ਧੋਨੀ ਇਕ ਮਹਾਨ ਖਿਡਾਰੀ ਹੈ।''